sutta » an » an4 » Aṅguttara Nikāya 4.211

Parisāsutta

Assembly

“Cattārome, bhikkhave, parisadūsanā.
“Mendicants, these four corrupt an assembly.

Katame cattāro?
What four?

Bhikkhu, bhikkhave, dussīlo pāpadhammo parisadūsano;
A monk, nun, layman, or laywoman who is unethical, of bad character.

bhikkhunī, bhikkhave, dussīlā pāpadhammā parisadūsanā;

upāsako, bhikkhave, dussīlo pāpadhammo parisadūsano;

upāsikā, bhikkhave, dussīlā pāpadhammā parisadūsanā.

Ime kho, bhikkhave, cattāro parisadūsanā.
These are the four that corrupt an assembly.

Cattārome, bhikkhave, parisasobhanā.
Mendicants, these four beautify an assembly.

Katame cattāro?
What four?

Bhikkhu, bhikkhave, sīlavā kalyāṇadhammo parisasobhano;
A monk, nun, layman, or laywoman who is ethical, of good character.

bhikkhunī, bhikkhave, sīlavatī kalyāṇadhammā parisasobhanā;

upāsako, bhikkhave, sīlavā kalyāṇadhammo parisasobhano;

upāsikā, bhikkhave, sīlavatī kalyāṇadhammā parisasobhanā.

Ime kho, bhikkhave, cattāro parisasobhanā”ti.
These are the four that beautify an assembly.”

Paṭhamaṁ.