Jātaka
Dukanipāta
Upāhanavagga
10. Mahāpiṅgalajātaka
“Sabbo jano hiṁsito piṅgalena,
Tasmiṁ mate paccayā vedayanti;
Piyo nu te āsi akaṇhanetto,
Kasmā nu tvaṁ rodasi dvārapāla”.
“Na me piyo āsi akaṇhanetto,
Bhāyāmi paccāgamanāya tassa;
Ito gato hiṁseyya maccurājaṁ,
So hiṁsito āneyya puna idha”.
“Daḍḍho vāhasahassehi,
sitto ghaṭasatehi so;
Parikkhatā ca sā bhūmi,
mā bhāyi nāgamissatī”ti.
Mahāpiṅgalajātakaṁ dasamaṁ.
Upāhanavaggo navamo.
Tassuddānaṁ
Varupāhana khujja vikaṇṇakako,
Asitābhuya pañcamavacchanakho;
Dija pemavaruttamaekapadaṁ,
Kumināmukha piṅgalakena dasāti.