Kathāvatthu
Mahāpaṇṇāsaka
Tatiyavagga
Aṭṭhamakakathā
Aṭṭhamakassa puggalassa diṭṭhipariyuṭṭhānaṁ pahīnanti?
Āmantā.
Aṭṭhamako puggalo sotāpanno sotāpattiphalappatto paṭiladdho adhigato sacchikato upasampajja viharati, kāyena phusitvā viharatīti?
Na hevaṁ vattabbe …pe….
Aṭṭhamakassa puggalassa vicikicchāpariyuṭṭhānaṁ pahīnanti?
Āmantā.
Aṭṭhamako puggalo sotāpanno sotāpattiphalappatto …pe… kāyena phusitvā viharatīti?
Na hevaṁ vattabbe …pe….
Aṭṭhamakassa puggalassa diṭṭhipariyuṭṭhānaṁ pahīnanti?
Āmantā.
Aṭṭhamakassa puggalassa diṭṭhānusayo pahīnoti?
Na hevaṁ vattabbe …pe…
aṭṭhamakassa puggalassa diṭṭhipariyuṭṭhānaṁ pahīnanti?
Āmantā.
Aṭṭhamakassa puggalassa vicikicchānusayo … sīlabbataparāmāso pahīnoti?
Na hevaṁ vattabbe …pe….
Aṭṭhamakassa puggalassa vicikicchāpariyuṭṭhānaṁ pahīnanti?
Āmantā.
Aṭṭhamakassa puggalassa vicikicchānusayo pahīnoti?
Na hevaṁ vattabbe …pe…
aṭṭhamakassa puggalassa vicikicchāpariyuṭṭhānaṁ pahīnanti?
Āmantā.
Aṭṭhamakassa puggalassa diṭṭhānusayo … sīlabbataparāmāso pahīnoti?
Na hevaṁ vattabbe …pe…
Aṭṭhamakassa puggalassa diṭṭhānusayo appahīnoti?
Āmantā.
Aṭṭhamakassa puggalassa diṭṭhipariyuṭṭhānaṁ appahīnanti?
Na hevaṁ vattabbe …pe…
aṭṭhamakassa puggalassa diṭṭhānusayo appahīnoti?
Āmantā.
Aṭṭhamakassa puggalassa vicikicchāpariyuṭṭhānaṁ appahīnanti?
Na hevaṁ vattabbe …pe….
Aṭṭhamakassa puggalassa vicikicchānusayo … sīlabbataparāmāso appahīnoti?
Āmantā.
Aṭṭhamakassa puggalassa diṭṭhipariyuṭṭhānaṁ appahīnanti?
Na hevaṁ vattabbe …pe…
aṭṭhamakassa puggalassa sīlabbataparāmāso appahīnoti?
Āmantā.
Aṭṭhamakassa puggalassa vicikicchāpariyuṭṭhānaṁ appahīnanti?
Na hevaṁ vattabbe …pe….
Aṭṭhamakassa puggalassa diṭṭhipariyuṭṭhānaṁ pahīnanti?
Āmantā.
Aṭṭhamakassa puggalassa diṭṭhipariyuṭṭhānapahānāya maggo bhāvitoti?
Na hevaṁ vattabbe …pe…
aṭṭhamakassa puggalassa diṭṭhipariyuṭṭhānaṁ pahīnanti?
Āmantā.
Aṭṭhamakassa puggalassa diṭṭhipariyuṭṭhānapahānāya satipaṭṭhānā bhāvitā …pe… sammappadhānā …pe… bojjhaṅgā bhāvitāti?
Na hevaṁ vattabbe.
Aṭṭhamakassa puggalassa vicikicchāpariyuṭṭhānaṁ pahīnanti?
Āmantā.
Aṭṭhamakassa puggalassa vicikicchāpariyuṭṭhānapahānāya maggo bhāvito …pe… bojjhaṅgā bhāvitāti?
Na hevaṁ vattabbe …pe….
Aṭṭhamakassa puggalassa diṭṭhipariyuṭṭhānapahānāya maggo abhāvitoti?
Āmantā.
Amaggena pahīnaṁ lokiyena sāsavena …pe… saṅkilesiyenāti?
Na hevaṁ vattabbe …pe…
aṭṭhamakassa puggalassa diṭṭhipariyuṭṭhānapahānāya satipaṭṭhānā …pe… bojjhaṅgā abhāvitāti?
Āmantā.
Amaggena pahīnaṁ lokiyena sāsavena …pe… saṅkilesiyenāti?
Na hevaṁ vattabbe …pe….
Aṭṭhamakassa puggalassa vicikicchāpariyuṭṭhānapahānāya maggo abhāvito …pe… satipaṭṭhānā …pe… bojjhaṅgā abhāvitāti?
Āmantā.
Amaggena pahīnaṁ lokiyena sāsavena …pe… saṅkilesiyenāti?
Na hevaṁ vattabbe …pe….
Na vattabbaṁ—
“aṭṭhamakassa puggalassa diṭṭhipariyuṭṭhānaṁ pahīnan”ti?
Āmantā.
Uppajjissatīti?
Nuppajjissati.
Hañci nuppajjissati, tena vata re vattabbe—
“aṭṭhamakassa puggalassa diṭṭhipariyuṭṭhānaṁ pahīnan”ti.
Na vattabbaṁ—
“aṭṭhamakassa puggalassa vicikicchāpariyuṭṭhānaṁ pahīnan”ti?
Āmantā.
Uppajjissatīti?
Nuppajjissati.
Hañci nuppajjissati, tena vata re vattabbe—
“aṭṭhamakassa puggalassa vicikicchāpariyuṭṭhānaṁ pahīnan”ti.
Aṭṭhamakassa puggalassa diṭṭhipariyuṭṭhānaṁ nuppajjissatīti katvā pahīnanti?
Āmantā.
Aṭṭhamakassa puggalassa diṭṭhānusayo nuppajjissatīti katvā pahīnoti?
Na hevaṁ vattabbe …pe….
Aṭṭhamakassa puggalassa diṭṭhipariyuṭṭhānaṁ nuppajjissatīti katvā pahīnanti?
Āmantā.
Aṭṭhamakassa puggalassa vicikicchānusayo … sīlabbataparāmāso nuppajjissatīti katvā pahīnoti?
Na hevaṁ vattabbe …pe….
Aṭṭhamakassa puggalassa vicikicchāpariyuṭṭhānaṁ nuppajjissatīti katvā pahīnanti?
Āmantā.
Aṭṭhamakassa puggalassa vicikicchānusayo … sīlabbataparāmāso nuppajjissatīti katvā pahīnoti?
Na hevaṁ vattabbe …pe….
Aṭṭhamakassa puggalassa diṭṭhipariyuṭṭhānaṁ nuppajjissatīti katvā pahīnanti?
Āmantā.
Gotrabhuno puggalassa diṭṭhipariyuṭṭhānaṁ nuppajjissatīti katvā pahīnanti?
Na hevaṁ vattabbe …pe…
aṭṭhamakassa puggalassa vicikicchāpariyuṭṭhānaṁ nuppajjissatīti katvā pahīnanti?
Āmantā.
Gotrabhuno puggalassa vicikicchāpariyuṭṭhānaṁ nuppajjissatīti katvā pahīnanti?
Na hevaṁ vattabbe …pe….
Aṭṭhamakakathā niṭṭhitā.