Kathāvatthu
Mahāpaṇṇāsaka
Aṭṭhamavagga
Arūpadhātukathā
Arūpino dhammā arūpadhātūti?
Āmantā.
Vedanā bhavo gati sattāvāso saṁsāro yoni viññāṇaṭṭhiti attabhāvapaṭilābhoti?
Na hevaṁ vattabbe …pe…
atthi vedanūpagaṁ kammanti?
Na hevaṁ vattabbe …pe…
atthi vedanūpagā sattāti?
Na hevaṁ vattabbe …pe…
vedanāya sattā jāyanti jīyanti mīyanti cavanti upapajjantīti?
Na hevaṁ vattabbe …pe…
vedanāya atthi vedanā saññā saṅkhārā viññāṇanti?
Na hevaṁ vattabbe …pe…
vedanā catuvokārabhavoti?
Na hevaṁ vattabbe …pe…
Arūpadhātu bhavo gati …pe…
attabhāvapaṭilābhoti?
Āmantā.
Vedanā bhavo gati …pe…
attabhāvapaṭilābhoti?
Na hevaṁ vattabbe …pe…
atthi arūpadhātūpagaṁ kammanti?
Āmantā.
Atthi vedanūpagaṁ kammanti?
Na hevaṁ vattabbe …pe…
atthi arūpadhātūpagā sattāti?
Āmantā.
Atthi vedanūpagā sattāti?
Na hevaṁ vattabbe …pe….
Arūpadhātuyā sattā jāyanti jīyanti mīyanti cavanti upapajjantīti?
Āmantā.
Vedanāya sattā jāyanti jīyanti mīyanti cavanti upapajjantīti?
Na hevaṁ vattabbe …pe…
arūpadhātuyā atthi vedanā saññā saṅkhārā viññāṇanti?
Āmantā.
Vedanāya atthi vedanā saññā saṅkhārā viññāṇanti?
Na hevaṁ vattabbe …pe…
arūpadhātu catuvokārabhavoti?
Āmantā.
Vedanā catuvokārabhavoti?
Na hevaṁ vattabbe …pe….
Arūpino dhammā arūpadhātu, kāmadhātuyā atthi vedanā saññā saṅkhārā viññāṇanti?
Āmantā.
Sāva kāmadhātu, sā arūpadhātūti?
Na hevaṁ vattabbe …pe…
sāva kāmadhātu, sā arūpadhātūti?
Āmantā.
Kāmabhavena samannāgato puggalo dvīhi bhavehi samannāgato hoti—
kāmabhavena ca arūpabhavena cāti?
Na hevaṁ vattabbe …pe….
Rūpino dhammā rūpadhātu, arūpino dhammā arūpadhātu, kāmadhātuyā atthi rūpaṁ vedanā saññā saṅkhārā viññāṇanti?
Āmantā.
Sāva kāmadhātu, sā rūpadhātu, sā arūpadhātūti?
Na hevaṁ vattabbe …pe…
sāva kāmadhātu, sā rūpadhātu, sā arūpadhātūti?
Āmantā.
Kāmabhavena samannāgato puggalo tīhi bhavehi samannāgato hoti—
kāmabhavena ca rūpabhavena ca arūpabhavena cāti?
Na hevaṁ vattabbe …pe….
Arūpadhātukathā niṭṭhitā.