Kathāvatthu
Mahāpaṇṇāsaka
Navamavagga
Nayathācittassavācātikathā
Na yathācittassa vācāti?
Āmantā.
Aphassakassa vācā avedanakassa vācā asaññakassa vācā acetanakassa vācā acittakassa vācāti?
Na hevaṁ vattabbe …pe…
nanu saphassakassa vācā savedanakassa vācā sasaññakassa vācā sacetanakassa vācā sacittakassa vācāti?
Āmantā.
Hañci saphassakassa vācā …pe…
sacittakassa vācā, no ca vata re vattabbe—
“na yathācittassa vācā”ti.
Na yathācittassa vācāti?
Āmantā.
Anāvaṭṭentassa vācā …pe…
anābhogassa vācā …pe… appaṇidahantassa vācāti?
Na hevaṁ vattabbe …pe…
nanu āvaṭṭentassa vācā ābhogassa vācā …pe… paṇidahantassa vācāti?
Āmantā.
Hañci āvaṭṭentassa vācā ābhogassa vācā paṇidahantassa vācā, no ca vata re vattabbe—
“na yathācittassa vācā”ti.
Na yathācittassa vācāti?
Āmantā.
Nanu vācā cittasamuṭṭhānā cittena sahajātā cittena saha ekuppādāti?
Āmantā.
Hañci vācā cittasamuṭṭhānā cittena sahajātā cittena saha ekuppādā, no ca vata re vattabbe—
“na yathācittassa vācā”ti.
Na yathācittassa vācāti?
Āmantā.
Na bhaṇitukāmo bhaṇati, na kathetukāmo katheti, na ālapitukāmo ālapati, na voharitukāmo voharatīti?
Na hevaṁ vattabbe …pe…
nanu bhaṇitukāmo bhaṇati, kathetukāmo katheti, ālapitukāmo ālapati, voharitukāmo voharatīti?
Āmantā.
Hañci bhaṇitukāmo bhaṇati, kathetukāmo katheti, ālapitukāmo ālapati, voharitukāmo voharati, no ca vata re vattabbe—
“na yathācittassa vācā”ti.
Na vattabbaṁ—
“na yathācittassa vācā”ti?
Āmantā.
Nanu atthi koci “aññaṁ bhaṇissāmī”ti aññaṁ bhaṇati, “aññaṁ kathessāmī”ti aññaṁ katheti, “aññaṁ ālapissāmī”ti aññaṁ ālapati, “aññaṁ voharissāmī”ti aññaṁ voharatīti?
Āmantā.
Hañci atthi koci “aññaṁ bhaṇissāmī”ti aññaṁ bhaṇati …pe…
“aññaṁ voharissāmī”ti aññaṁ voharati, tena vata re vattabbe—
“na yathācittassa vācā”ti.
Na yathācittassa vācātikathā niṭṭhitā.