Kathāvatthu
Mahāpaṇṇāsaka
Soḷasamavagga
Sukhānuppadānakathā
Paro parassa sukhaṁ anuppadetīti?
Āmantā.
Paro parassa dukkhaṁ anuppadetīti?
Na hevaṁ vattabbe …pe…
paro parassa dukkhaṁ na anuppadetīti?
Āmantā.
Paro parassa sukhaṁ na anuppadetīti?
Na hevaṁ vattabbe …pe…
paro parassa sukhaṁ anuppadetīti?
Āmantā.
Paro parassa attano sukhaṁ anuppadeti, aññesaṁ sukhaṁ anuppadeti, tassa sukhaṁ anuppadetīti?
Na hevaṁ vattabbe …pe…
paro parassa nevattano, na aññesaṁ, na tassa sukhaṁ anuppadetīti?
Āmantā.
Hañci paro parassa nevattano, na aññesaṁ, na tassa sukhaṁ anuppadeti, no ca vata re vattabbe—
“paro parassa sukhaṁ anuppadetī”ti.
Paro parassa sukhaṁ anuppadetīti?
Āmantā.
Añño aññassa kārako, paraṅkataṁ sukhaṁ dukkhaṁ añño karoti añño paṭisaṁvedetīti?
Na hevaṁ vattabbe …pe….
Na vattabbaṁ—
“paro parassa sukhaṁ anuppadetī”ti?
Āmantā.
Nanu āyasmā udāyī etadavoca—
“bahūnaṁ vata no bhagavā dukkhadhammānaṁ apahattā, bahūnaṁ vata no bhagavā sukhadhammānaṁ upahattā, bahūnaṁ vata no bhagavā akusalānaṁ dhammānaṁ apahattā, bahūnaṁ vata no bhagavā kusalānaṁ dhammānaṁ upahattā”ti.
Attheva suttantoti?
Āmantā.
Tena hi paro parassa sukhaṁ anuppadetīti.
Sukhānuppadānakathā niṭṭhitā.