Kathāvatthu

Mahāpaṇṇāsaka

Sattarasamavagga

Navattabbaṁsaṅghassadinnaṁmahapphalantikathā

Na vattabbaṁ—

“saṅghassa dinnaṁ mahapphalan”ti?

Āmantā.

Nanu saṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassāti?

Āmantā.

Hañci saṅgho āhuneyyo …pe… anuttaraṁ puññakkhettaṁ lokassa, tena vata re vattabbe—

“saṅghassa dinnaṁ mahapphalan”ti.

Na vattabbaṁ—

“saṅghassa dinnaṁ mahapphalan”ti?

Āmantā.

Nanu cattāro purisayugā aṭṭha purisapuggalā dakkhiṇeyyā vuttā bhagavatāti?

Āmantā.

Hañci cattāro purisayugā aṭṭha purisapuggalā dakkhiṇeyyā vuttā bhagavatā, tena vata re vattabbe—

“saṅghassa dinnaṁ mahapphalan”ti.

Na vattabbaṁ—

“saṅghassa dinnaṁ mahapphalan”ti?

Āmantā.

Nanu vuttaṁ bhagavatā—

“saṅghe, gotami, dehi, saṅghe te dinne ahañceva pūjito bhavissāmi saṅgho cā”ti.

Attheva suttantoti?

Āmantā.

Tena hi saṅghassa dinnaṁ mahapphalanti.

Na vattabbaṁ—

“saṅghassa dinnaṁ mahapphalan”ti?

Āmantā.

Nanu sakko devānamindo bhagavantaṁ etadavoca—

“Yajamānānaṁ manussānaṁ,

puññapekkhāna pāṇinaṁ;

Karotaṁ opadhikaṁ puññaṁ,

kattha dinnaṁ mahapphalan”ti.

“Cattāro ca paṭipannā,

cattāro ca phale ṭhitā;

Esa saṅgho ujubhūto,

paññāsīlasamāhito.

Yajamānānaṁ manussānaṁ,

puññapekkhāna pāṇinaṁ;

Karotaṁ opadhikaṁ puññaṁ,

saṅghe dinnaṁ mahapphalanti.

Eso hi saṅgho vipulo mahaggato,

Esappameyyo udadhīva sāgaro;

Ete hi seṭṭhā naravīrasāvakā,

Pabhaṅkarā dhammamudīrayanti.

Tesaṁ sudinnaṁ suhutaṁ suyiṭṭhaṁ,

Ye saṅghamuddissa dadanti dānaṁ;

Sā dakkhiṇā saṅghagatā patiṭṭhitā,

Mahapphalā lokavidūna vaṇṇitā.

Etādisaṁ yaññamanussarantā,

Ye vedajātā vicaranti loke;

Vineyya maccheramalaṁ samūlaṁ,

Aninditā saggamupenti ṭhānan”ti.

Attheva suttantoti?

Āmantā.

Tena hi saṅghassa dinnaṁ mahapphalanti.

Na vattabbaṁ saṅghassa dinnaṁ mahapphalantikathā niṭṭhitā.