Kathāvatthu
Mahāpaṇṇāsaka
Ekūnavīsatimavagga
Suññatākathā
Suññatā saṅkhārakkhandhapariyāpannāti?
Āmantā.
Animittaṁ saṅkhārakkhandhapariyāpannanti?
Na hevaṁ vattabbe …pe…
suññatā saṅkhārakkhandhapariyāpannāti?
Āmantā.
Appaṇihito saṅkhārakkhandhapariyāpannoti?
Na hevaṁ vattabbe …pe…
animittaṁ na vattabbaṁ—
“saṅkhārakkhandhapariyāpannan”ti?
Āmantā.
Suññatā na vattabbā—
“saṅkhārakkhandhapariyāpannā”ti?
Na hevaṁ vattabbe …pe…
appaṇihito na vattabbo—
“saṅkhārakkhandhapariyāpanno”ti?
Āmantā.
Suññatā na vattabbā—
“saṅkhārakkhandhapariyāpannā”ti?
Na hevaṁ vattabbe …pe….
Suññatā saṅkhārakkhandhapariyāpannāti?
Āmantā.
Saṅkhārakkhandho na anicco na saṅkhato na paṭiccasamuppanno na khayadhammo na vayadhammo na virāgadhammo na nirodhadhammo na vipariṇāmadhammoti?
Na hevaṁ vattabbe …pe…
nanu saṅkhārakkhandho anicco saṅkhato paṭiccasamuppanno khayadhammo vayadhammo virāgadhammo nirodhadhammo vipariṇāmadhammoti?
Āmantā.
Hañci saṅkhārakkhandho anicco …pe…
vipariṇāmadhammo, no ca vata re vattabbe—
“suññatā saṅkhārakkhandhapariyāpannā”ti.
Rūpakkhandhassa suññatā saṅkhārakkhandhapariyāpannāti?
Āmantā.
Saṅkhārakkhandhassa suññatā rūpakkhandhapariyāpannāti?
Na hevaṁ vattabbe …pe…
vedanākkhandhassa …pe…
saññākkhandhassa …
viññāṇakkhandhassa suññatā saṅkhārakkhandhapariyāpannāti?
Āmantā.
Saṅkhārakkhandhassa suññatā viññāṇakkhandhapariyāpannāti?
Na hevaṁ vattabbe …pe….
Saṅkhārakkhandhassa suññatā na vattabbā—
“rūpakkhandhapariyāpannā”ti?
Āmantā.
Rūpakkhandhassa suññatā na vattabbā—
“saṅkhārakkhandhapariyāpannā”ti?
Na hevaṁ vattabbe …pe…
saṅkhārakkhandhassa suññatā na vattabbā—
“vedanākkhandhapariyāpannā …pe…
saññākkhandhapariyāpannā …
viññāṇakkhandhapariyāpannā”ti?
Āmantā.
Viññāṇakkhandhassa suññatā na vattabbā—
“saṅkhārakkhandhapariyāpannā”ti?
Na hevaṁ vattabbe …pe….
Na vattabbaṁ—
“suññatā saṅkhārakkhandhapariyāpannā”ti?
Āmantā.
Nanu vuttaṁ bhagavatā—
“suññamidaṁ, bhikkhave, saṅkhārā attena vā attaniyena vā”ti.
Attheva suttantoti?
Āmantā.
Tena hi suññatā saṅkhārakkhandhapariyāpannāti.
Suññatākathā niṭṭhitā.