sutta » kn » mil » Milindapañha

6. Apuññapañha

“Bhante nāgasena, tumhe bhaṇatha—

‘yo ajānanto pāṇātipātaṁ karoti, so balavataraṁ apuññaṁ pasavatī’ti.

Puna ca bhagavatā vinayapaññattiyā bhaṇitaṁ—

‘anāpatti ajānantassā’ti.

Yadi, bhante nāgasena, ajānitvā pāṇātipātaṁ karonto balavataraṁ apuññaṁ pasavati, tena hi ‘anāpatti ajānantassā’ti yaṁ vacanaṁ, taṁ micchā.

Yadi anāpatti ajānantassa, tena hi ‘ajānitvā pāṇātipātaṁ karonto balavataraṁ apuññaṁ pasavatī’ti tampi vacanaṁ micchā.

Ayampi ubhato koṭiko pañho duruttaro duratikkamo tavānuppatto, so tayā nibbāhitabbo”ti.

“Bhāsitampetaṁ, mahārāja, bhagavatā ‘yo ajānanto pāṇātipātaṁ karoti, so balavataraṁ apuññaṁ pasavatī’ti.

Puna ca vinayapaññattiyā bhagavatā bhaṇitaṁ—

‘anāpatti ajānantassā’ti.

Tattha atthantaraṁ atthi.

Katamaṁ atthantaraṁ?

Atthi, mahārāja, āpatti saññāvimokkhā, atthi āpatti nosaññāvimokkhā.

Yāyaṁ, mahārāja, āpatti saññāvimokkhā, taṁ āpattiṁ ārabbha bhagavatā bhaṇitaṁ—

‘anāpatti ajānantassā’”ti.

“Sādhu, bhante nāgasena, evametaṁ tathā sampaṭicchāmī”ti.

Apuññapañho chaṭṭho.