Paṭṭhānapakaraṇa
Dhammapaccanīya (2), Dukapaṭṭhānapāḷi (2)
8.1. Hetuduka
Hetu
Namo tassa Bhagavato Arahato Sammāsambuddhassa.
Nahetuṁ dhammaṁ paṭicca nahetu dhammo uppajjati hetupaccayā—nahetuṁ ekaṁ khandhaṁ paṭicca tayo khandhā cittasamuṭṭhānañca rūpaṁ …pe… dve khandhe paṭicca dve khandhā cittasamuṭṭhānañca rūpaṁ; paṭisandhikkhaṇe …pe… (yāva mahābhūtā.) Nahetuṁ dhammaṁ paṭicca na nahetu dhammo uppajjati hetupaccayā—nahetū khandhe paṭicca hetū; paṭisandhikkhaṇe …pe… nahetuṁ dhammaṁ paṭicca nahetu ca na nahetu ca dhammā uppajjanti hetupaccayā.
Na nahetuṁ dhammaṁ paṭicca na nahetu dhammo uppajjati hetupaccayā. Na nahetuṁ dhammaṁ paṭicca nahetu dhammo uppajjati hetupaccayā. Na nahetuṁ dhammaṁ paṭicca nahetu ca na nahetu ca dhammā uppajjanti hetupaccayā.
Nahetuñca na nahetuñca dhammaṁ paṭicca nahetu dhammo uppajjati hetupaccayā. Nahetuñca na nahetuñca dhammaṁ paṭicca na nahetu dhammo uppajjati hetupaccayā. Nahetuñca na nahetuñca dhammaṁ paṭicca nahetu ca na nahetu ca dhammā uppajjanti hetupaccayā. (Saṅkhittaṁ.)
Hetuyā nava, ārammaṇe nava …pe… avigate nava.
(Sahajātavārampi …pe… sampayuttavārampi paṭiccavārasadisaṁ evaṁ vitthāretabbaṁ.)
Hetu-ārammaṇa
Na nahetu dhammo na nahetussa dhammassa hetupaccayena paccayo. Na nahetu dhammo nahetussa dhammassa hetupaccayena paccayo. Na nahetu dhammo nahetussa ca na nahetussa ca dhammassa hetupaccayena paccayo.
Nahetu dhammo nahetussa dhammassa ārammaṇapaccayena paccayo. Nahetu dhammo na nahetussa dhammassa ārammaṇapaccayena paccayo. Nahetu dhammo nahetussa ca na nahetussa ca dhammassa ārammaṇapaccayena paccayo.
Na nahetu dhammo na nahetussa dhammassa ārammaṇapaccayena paccayo. Na nahetu dhammo nahetussa dhammassa ārammaṇapaccayena paccayo. Na nahetu dhammo nahetussa ca na nahetussa ca dhammassa ārammaṇapaccayena paccayo.
Nahetu ca na nahetu ca dhammā nahetussa dhammassa ārammaṇapaccayena paccayo. Nahetu ca na nahetu ca dhammā na nahetussa dhammassa ārammaṇapaccayena paccayo. Nahetu ca na nahetu ca dhammā nahetussa ca na nahetussa ca dhammassa ārammaṇapaccayena paccayo. (Saṅkhittaṁ.)
Hetuyā tīṇi, ārammaṇe nava …pe… purejāte pacchājāte tīṇi …pe… kamme tīṇi …pe… jhāne tīṇi …pe… vippayutte pañca …pe… avigate nava. (Yathā kusalattike pañhāvāraṁ, evaṁ vitthāretabbaṁ.)