Paṭṭhānapakaraṇa
Dhammapaccanīya (2), Dukapaṭṭhānapāḷi (2)
8.19. Āsavavippayuttasāsavaduka
Āsavavippayuttaṁ nasāsavaṁ dhammaṁ paṭicca āsavavippayutto nasāsavo dhammo uppajjati hetupaccayā. Āsavavippayuttaṁ nasāsavaṁ dhammaṁ paṭicca āsavavippayutto naanāsavo dhammo uppajjati hetupaccayā. Āsavavippayuttaṁ nasāsavaṁ dhammaṁ paṭicca āsavavippayutto nasāsavo ca āsavavippayutto naanāsavo ca dhammā uppajjanti hetupaccayā.
Āsavavippayuttaṁ naanāsavaṁ dhammaṁ paṭicca āsavavippayutto naanāsavo dhammo uppajjati hetupaccayā.
Āsavavippayuttaṁ nasāsavañca āsavavippayuttaṁ naanāsavañca dhammaṁ paṭicca āsavavippayutto naanāsavo dhammo uppajjati hetupaccayā. (Saṅkhittaṁ.)
Hetuyā pañca, ārammaṇe dve …pe… avigate pañca. (Sabbattha vitthāro.)
Āsavagocchakaṁ niṭṭhitaṁ.