Paṭṭhānapakaraṇa
Dhammapaccanīya (2), Dukapaṭṭhānapāḷi (2)
8.31. Ganthavippayuttaganthaniyaduka
Ganthavippayuttaṁ naganthaniyaṁ dhammaṁ paṭicca ganthavippayutto naganthaniyo dhammo uppajjati hetupaccayā. Ganthavippayuttaṁ naganthaniyaṁ dhammaṁ paṭicca ganthavippayutto naaganthaniyo dhammo uppajjati hetupaccayā. Ganthavippayuttaṁ naganthaniyaṁ dhammaṁ paṭicca ganthavippayutto naganthaniyo ca ganthavippayutto naaganthaniyo ca dhammā uppajjanti hetupaccayā.
Ganthavippayuttaṁ naaganthaniyaṁ dhammaṁ paṭicca ganthavippayutto naaganthaniyo dhammo uppajjati hetupaccayā.
Ganthavippayuttaṁ naganthaniyañca ganthavippayuttaṁ naaganthaniyañca dhammaṁ paṭicca ganthavippayutto naaganthaniyo dhammo uppajjati hetupaccayā. (Saṅkhittaṁ.)
Hetuyā pañca, ārammaṇe dve …pe… avigate pañca. (Sabbattha vitthāro.)
Ganthagocchakaṁ niṭṭhitaṁ.