Paṭṭhānapakaraṇa
Dhammānulomapaccanīya (3), Tikapaṭṭhānapāḷi (1)
13.8. Dassanattika
Hetu
Dassanena pahātabbaṁ dhammaṁ paṭicca nadassanena pahātabbo dhammo uppajjati hetupaccayā. Dassanena pahātabbaṁ dhammaṁ paṭicca nabhāvanāya pahātabbo dhammo uppajjati hetupaccayā. Dassanena pahātabbaṁ dhammaṁ paṭicca nanevadassanena nabhāvanāya pahātabbo dhammo uppajjati hetupaccayā. Dassanena pahātabbaṁ dhammaṁ paṭicca nabhāvanāya pahātabbo ca nanevadassanena nabhāvanāya pahātabbo ca dhammā uppajjanti hetupaccayā. Dassanena pahātabbaṁ dhammaṁ paṭicca nadassanena pahātabbo ca nabhāvanāya pahātabbo ca dhammā uppajjanti hetupaccayā.
Bhāvanāya pahātabbaṁ dhammaṁ paṭicca nabhāvanāya pahātabbo dhammo uppajjati hetupaccayā … pañca.
Nevadassanena nabhāvanāya pahātabbaṁ dhammaṁ paṭicca nadassanena pahātabbo dhammo uppajjati hetupaccayā … tīṇi.
Dassanena pahātabbañca nevadassanena nabhāvanāya pahātabbañca dhammaṁ paṭicca nadassanena pahātabbo dhammo uppajjati hetupaccayā … tīṇi.
Bhāvanāya pahātabbañca nevadassanena nabhāvanāya pahātabbañca dhammaṁ paṭicca nadassanena pahātabbo dhammo uppajjati hetupaccayā … tīṇi. (Saṅkhittaṁ.)
Hetuyā ekūnavīsa, ārammaṇe nava …pe… vipāke tīṇi …pe… avigate ekūnavīsa.
(Sahajātavārampi …pe… sampayuttavārampi pañhāvārampi vitthāretabbaṁ.)