Paṭṭhānapakaraṇa
Dhammānulomapaccanīya (3), Dukatikapaṭṭhānapāḷi (3)
15.62. Upekkhāsahagataduka, Kusalattika
Upekkhāsahagataṁ kusalaṁ dhammaṁ paṭicca naupekkhāsahagato nakusalo dhammo uppajjati hetupaccayā. Naupekkhāsahagataṁ kusalaṁ dhammaṁ paṭicca naupekkhāsahagato nakusalo dhammo uppajjati hetupaccayā. Upekkhāsahagataṁ kusalañca naupekkhāsahagataṁ kusalañca dhammaṁ paṭicca naupekkhāsahagato nakusalo dhammo uppajjati hetupaccayā. Hetuyā tīṇi …pe… avigate tīṇi.
Upekkhāsahagataṁ akusalaṁ dhammaṁ paṭicca naupekkhāsahagato naakusalo dhammo uppajjati hetupaccayā. Naupekkhāsahagataṁ akusalaṁ dhammaṁ paṭicca naupekkhāsahagato naakusalo dhammo uppajjati hetupaccayā. Upekkhāsahagataṁ akusalañca naupekkhāsahagataṁ akusalañca dhammaṁ paṭicca naupekkhāsahagato naakusalo dhammo uppajjati hetupaccayā. Hetuyā tīṇi …pe… avigate tīṇi. (Abyākatamūlaṁ tīṇiyeva paccayavasena.)