Paṭṭhānapakaraṇa
Dhammānulomapaccanīya (3), Tikadukapaṭṭhānapāḷi (4)
16.54. Sanidassanattika, Sappaṭighaduka
Anidassanasappaṭighaṁ sappaṭighaṁ dhammaṁ paṭicca naanidassanasappaṭigho nasappaṭigho dhammo uppajjati hetupaccayā. Anidassanasappaṭighaṁ sappaṭighaṁ dhammaṁ paṭicca nasanidassanasappaṭigho nasappaṭigho dhammo uppajjati hetupaccayā. Anidassanasappaṭighaṁ sappaṭighaṁ dhammaṁ paṭicca nasanidassanasappaṭigho nasappaṭigho ca naanidassanasappaṭigho nasappaṭigho ca dhammā uppajjanti hetupaccayā. (Saṅkhittaṁ.) Hetuyā tīṇi …pe… avigate tīṇi.
Anidassanaappaṭighaṁ appaṭighaṁ dhammaṁ paṭicca naanidassanaappaṭigho naappaṭigho dhammo uppajjati hetupaccayā. Anidassanaappaṭighaṁ appaṭighaṁ dhammaṁ paṭicca nasanidassanasappaṭigho naappaṭigho dhammo uppajjati hetupaccayā …pe… anidassanaappaṭighaṁ appaṭighaṁ dhammaṁ paṭicca naanidassanasappaṭigho naappaṭigho ca naanidassanaappaṭigho naappaṭigho ca dhammā uppajjanti hetupaccayā. (Saṅkhittaṁ.) Hetuyā pañca, adhipatiyā pañca …pe… aññamaññe tīṇi …pe… avigate pañca.