Paṭṭhānapakaraṇa
Dhammānulomapaccanīya (3), Tikadukapaṭṭhānapāḷi (4)
16.63. Sanidassanattika, Āsavavippayuttasāsavaduka
Anidassanaappaṭighaṁ āsavavippayuttaṁ sāsavaṁ dhammaṁ paccayā nasanidassanasappaṭigho āsavavippayutto nasāsavo dhammo uppajjati hetupaccayā. Anidassanaappaṭighaṁ āsavavippayuttaṁ sāsavaṁ dhammaṁ paccayā naanidassanasappaṭigho āsavavippayutto nasāsavo dhammo uppajjati hetupaccayā. Anidassanaappaṭighaṁ āsavavippayuttaṁ sāsavaṁ dhammaṁ paccayā nasanidassanasappaṭigho āsavavippayutto nasāsavo ca naanidassanasappaṭigho āsavavippayutto nasāsavo ca dhammā uppajjanti hetupaccayā. (Saṅkhittaṁ.) Hetuyā tīṇi …pe… avigate tīṇi.
Anidassanaappaṭighaṁ āsavavippayuttaṁ anāsavaṁ dhammaṁ paṭicca naanidassanaappaṭigho āsavavippayutto naanāsavo dhammo uppajjati hetupaccayā. Anidassanaappaṭighaṁ āsavavippayuttaṁ anāsavaṁ dhammaṁ paṭicca nasanidassanasappaṭigho āsavavippayutto naanāsavo dhammo uppajjati hetupaccayā …pe… anidassanaappaṭighaṁ āsavavippayuttaṁ anāsavaṁ dhammaṁ paṭicca nasanidassanasappaṭigho āsavavippayutto naanāsavo ca naanidassanasappaṭigho āsavavippayutto naanāsavo ca dhammā uppajjanti hetupaccayā. (Saṅkhittaṁ.) Hetuyā cha, adhipatiyā cha …pe… avigate cha.