Paṭṭhānapakaraṇa
Dhammānulomapaccanīya (3), Tikadukapaṭṭhānapāḷi (4)
16.78. Sanidassanattika, Dassanenapahātabbaduka
Anidassanaappaṭighaṁ dassanena pahātabbaṁ dhammaṁ paṭicca naanidassanaappaṭigho nadassanena pahātabbo dhammo uppajjati hetupaccayā. (Saṅkhittaṁ.)
Hetuyā cha, adhipatiyā cha …pe… avigate cha.
Anidassanaappaṭighaṁ nadassanena pahātabbaṁ dhammaṁ paccayā nasanidassanasappaṭigho nanadassanena pahātabbo dhammo uppajjati hetupaccayā. Anidassanaappaṭighaṁ nadassanena pahātabbaṁ dhammaṁ paccayā naanidassanasappaṭigho nanadassanena pahātabbo dhammo uppajjati hetupaccayā. Anidassanaappaṭighaṁ nadassanena pahātabbaṁ dhammaṁ paccayā nasanidassanasappaṭigho nanadassanena pahātabbo ca naanidassanasappaṭigho nanadassanena pahātabbo ca dhammā uppajjanti hetupaccayā. (Saṅkhittaṁ.)
Hetuyā tīṇi …pe… avigate tīṇi.