Paṭṭhānapakaraṇa
Dhammānulomapaccanīya (3), Tikadukapaṭṭhānapāḷi (4)
16.84. Sanidassanattika, Sappītikaduka
Anidassanaappaṭighaṁ sappītikaṁ dhammaṁ paṭicca naanidassanaappaṭigho nasappītiko dhammo uppajjati hetupaccayā. Anidassanaappaṭighaṁ sappītikaṁ dhammaṁ paṭicca nasanidassanasappaṭigho nasappītiko dhammo uppajjati hetupaccayā …pe… anidassanaappaṭighaṁ sappītikaṁ dhammaṁ paṭicca nasanidassanasappaṭigho nasappītiko ca naanidassanasappaṭigho nasappītiko ca dhammā uppajjanti hetupaccayā. (Saṅkhittaṁ.) Hetuyā cha, ārammaṇe tīṇi …pe… avigate cha.
Anidassanaappaṭighaṁ appītikaṁ dhammaṁ paṭicca nasanidassanasappaṭigho naappītiko dhammo uppajjati hetupaccayā. Anidassanaappaṭighaṁ appītikaṁ dhammaṁ paṭicca naanidassanasappaṭigho naappītiko dhammo uppajjati hetupaccayā. Anidassanaappaṭighaṁ appītikaṁ dhammaṁ paṭicca nasanidassanasappaṭigho naappītiko ca naanidassanasappaṭigho naappītiko ca dhammā uppajjanti hetupaccayā. (Saṅkhittaṁ.) Hetuyā tīṇi …pe… avigate tīṇi.