Paṭṭhānapakaraṇa
Dhammānulomapaccanīya (3), Dukadukapaṭṭhānapāḷi (6)
18.20. Āsavavippayuttasāsavaduka, Hetuduka
Āsavavippayuttaṁ sāsavaṁ hetuṁ dhammaṁ paṭicca āsavavippayutto naanāsavo nahetu dhammo uppajjati hetupaccayā … ekaṁ.
Āsavavippayuttaṁ anāsavaṁ hetuṁ dhammaṁ paṭicca āsavavippayutto naanāsavo nahetu dhammo uppajjati hetupaccayā … tīṇi. (Saṅkhittaṁ.) Hetuyā cattāri, ārammaṇe dve …pe… avigate cattāri.
Āsavavippayuttaṁ sāsavaṁ nahetuṁ dhammaṁ paṭicca āsavavippayutto naanāsavo nanahetu dhammo uppajjati hetupaccayā. Āsavavippayuttaṁ anāsavaṁ nahetuṁ dhammaṁ paṭicca āsavavippayutto nasāsavo nanahetu dhammo uppajjati hetupaccayā. (Saṅkhittaṁ.) Hetuyā dve …pe… avigate dve.