Paṭṭhānapakaraṇa
Dhammapaccanīyānuloma (4), Tikadukapaṭṭhānapāḷi (4)
22.1. Kusalattika, Hetuduka
Namo tassa Bhagavato Arahato Sammāsambuddhassa.
Nakusalaṁ nahetuṁ dhammaṁ paṭicca akusalo hetu dhammo uppajjati hetupaccayā. Nakusalaṁ nahetuṁ dhammaṁ paṭicca abyākato hetu dhammo uppajjati hetupaccayā.
Naakusalaṁ nahetuṁ dhammaṁ paṭicca kusalo hetu dhammo uppajjati hetupaccayā. Naakusalaṁ nahetuṁ dhammaṁ paṭicca abyākato hetu dhammo uppajjati hetupaccayā.
Naabyākataṁ nahetuṁ dhammaṁ paṭicca kusalo hetu dhammo uppajjati hetupaccayā. Naabyākataṁ nahetuṁ dhammaṁ paṭicca akusalo hetu dhammo uppajjati hetupaccayā.
Nakusalaṁ nahetuñca naabyākataṁ nahetuñca dhammaṁ paṭicca akusalo hetu dhammo uppajjati hetupaccayā. Naakusalaṁ nahetuñca naabyākataṁ nahetuñca dhammaṁ paṭicca kusalo hetu dhammo uppajjati hetupaccayā. Nakusalaṁ nahetuñca naakusalaṁ nahetuñca dhammaṁ paṭicca abyākato hetu dhammo uppajjati hetupaccayā … tīṇi. (Saṅkhittaṁ.)
Hetuyā nava …pe… vipāke tīṇi …pe… avigate nava.
Nakusalaṁ nanahetuṁ dhammaṁ paṭicca akusalo nahetu dhammo uppajjati hetupaccayā. Nakusalaṁ nanahetuṁ dhammaṁ paṭicca abyākato nahetu dhammo uppajjati hetupaccayā. Nakusalaṁ nanahetuṁ dhammaṁ paṭicca akusalo nahetu ca abyākato nahetu ca dhammā uppajjanti hetupaccayā … tīṇi.
Naakusalaṁ nanahetuṁ dhammaṁ paṭicca kusalo nahetu dhammo uppajjati hetupaccayā. Naakusalaṁ nanahetuṁ dhammaṁ paṭicca abyākato nahetu dhammo uppajjati hetupaccayā. Naakusalaṁ nanahetuṁ dhammaṁ paṭicca kusalo nahetu ca abyākato nahetu ca dhammā uppajjanti hetupaccayā … tīṇi.
Naabyākataṁ nanahetuṁ dhammaṁ paṭicca abyākato nahetu dhammo uppajjati hetupaccayā … pañca.
Nakusalaṁ nanahetuñca naabyākataṁ nanahetuñca dhammaṁ paṭicca akusalo nahetu dhammo uppajjati hetupaccayā … tīṇi.
Naakusalaṁ nanahetuñca naabyākataṁ nanahetuñca dhammaṁ paṭicca kusalo nahetu dhammo uppajjati hetupaccayā … tīṇi.
Nakusalaṁ nanahetuñca naakusalaṁ nanahetuñca dhammaṁ paṭicca abyākato nahetu dhammo uppajjati hetupaccayā … ekaṁ. (Saṅkhittaṁ.)
Hetuyā aṭṭhārasa, ārammaṇe nava …pe… vipāke tīṇi …pe… avigate aṭṭhārasa.