Paṭṭhānapakaraṇa
Dhammapaccanīyānuloma (4), Tikatikapaṭṭhānapāḷi (5)
23.17. Kusalattika, Atītattikadvaya
Nakusalo napaccuppanno dhammo kusalassa paccuppannassa dhammassa ārammaṇapaccayena paccayo. (Saṅkhittaṁ.)
Ārammaṇe aṭṭhārasa, adhipatiyā anantare samanantare soḷasa, upanissaye aṭṭhārasa, natthiyā vigate soḷasa.
Nakusalaṁ naatītārammaṇaṁ dhammaṁ paṭicca abyākato atītārammaṇo dhammo uppajjati hetupaccayā. (Saṅkhittaṁ.) Hetuyā tīṇi …pe… avigate tīṇi.
Nakusalaṁ naanāgatārammaṇaṁ dhammaṁ paccayā kusalo anāgatārammaṇo dhammo uppajjati hetupaccayā. (Saṅkhittaṁ.) Hetuyā nava …pe… vipāke tīṇi …pe… avigate nava.
Nakusalaṁ napaccuppannārammaṇaṁ dhammaṁ paṭicca abyākato paccuppannārammaṇo dhammo uppajjati hetupaccayā. (Saṅkhittaṁ.) Hetuyā tīṇi …pe… avigate tīṇi.