Therāpadāna
Buddhavagga
Khadiravaniyarevatattheraapadāna
“Gaṅgā bhāgīrathī nāma,
himavantā pabhāvitā;
Kutitthe nāviko āsiṁ,
orime ca tariṁ ahaṁ.
Padumuttaro nāyako,
sambuddho dvipaduttamo;
Vasī satasahassehi,
gaṅgātīramupāgato.
Bahū nāvā samānetvā,
vaḍḍhakīhi susaṅkhataṁ;
Nāvāya chadanaṁ katvā,
paṭimāniṁ narāsabhaṁ.
Āgantvāna ca sambuddho,
ārūhi tañca nāvakaṁ;
Vārimajjhe ṭhito satthā,
imā gāthā abhāsatha.
‘Yo so tāresi sambuddhaṁ,
saṅghañcāpi anāsavaṁ;
Tena cittappasādena,
devaloke ramissati.
Nibbattissati te byamhaṁ,
sukataṁ nāvasaṇṭhitaṁ;
Ākāse pupphachadanaṁ,
dhārayissati sabbadā.
Aṭṭhapaññāsakappamhi,
tārako nāma khattiyo;
Cāturanto vijitāvī,
cakkavattī bhavissati.
Sattapaññāsakappamhi,
cammako nāma khattiyo;
Uggacchantova sūriyo,
jotissati mahabbalo.
Kappasatasahassamhi,
okkākakulasambhavo;
Gotamo nāma gottena,
satthā loke bhavissati.
Tidasā so cavitvāna,
manussattaṁ gamissati;
Revato nāma nāmena,
brahmabandhu bhavissati.
Agārā nikkhamitvāna,
sukkamūlena codito;
Gotamassa bhagavato,
sāsane pabbajissati.
So pacchā pabbajitvāna,
yuttayogo vipassako;
Sabbāsave pariññāya,
nibbāyissatināsavo’.
Vīriyaṁ me dhuradhorayhaṁ,
Yogakkhemādhivāhanaṁ;
Dhāremi antimaṁ dehaṁ,
Sammāsambuddhasāsane.
Satasahasse kataṁ kammaṁ,
phalaṁ dassesi me idha;
Sumutto saravegova,
kilese jhāpayī mama.
Tato maṁ vananirataṁ,
disvā lokantagū muni;
Vanavāsibhikkhūnaggaṁ,
paññapesi mahāmati.
Paṭisambhidā catasso,
vimokkhāpi ca aṭṭhime;
Chaḷabhiññā sacchikatā,
kataṁ buddhassa sāsanaṁ”.
Itthaṁ sudaṁ āyasmā khadiravaniyo revato thero imā gāthāyo abhāsitthāti.
Khadiravaniyarevatattherassāpadānaṁ navamaṁ.