Therāpadāna
Upālivagga
10. Cundattheraapadāna
“Siddhatthassa bhagavato,
lokajeṭṭhassa tādino;
Agghiyaṁ kārayitvāna,
jātipupphehi chādayiṁ.
Niṭṭhāpetvāna taṁ pupphaṁ,
buddhassa upanāmayiṁ;
Pupphāvasesaṁ paggayha,
buddhassa abhiropayiṁ.
Kañcanagghiyasaṅkāsaṁ,
buddhaṁ lokagganāyakaṁ;
Pasannacitto sumano,
pupphagghiyamupānayiṁ.
Vitiṇṇakaṅkho sambuddho,
tiṇṇoghehi purakkhato;
Bhikkhusaṅghe nisīditvā,
imā gāthā abhāsatha.
‘Dibbagandhaṁ pavāyantaṁ,
yo me pupphagghiyaṁ adā;
Tamahaṁ kittayissāmi,
suṇātha mama bhāsato.
Ito cuto ayaṁ poso,
devasaṅghapurakkhato;
Jātipupphehi parikiṇṇo,
devalokaṁ gamissati.
Ubbiddhaṁ bhavanaṁ tassa,
Sovaṇṇañca maṇīmayaṁ;
Byamhaṁ pātubhavissati,
Puññakammappabhāvitaṁ.
Catusattatikkhattuṁ so,
devarajjaṁ karissati;
Anubhossati sampattiṁ,
accharāhi purakkhato.
Pathabyā rajjaṁ tisataṁ,
vasudhaṁ āvasissati;
Pañcasattatikkhattuñca,
cakkavattī bhavissati.
Dujjayo nāma nāmena,
hessati manujādhipo;
Anubhotvāna taṁ puññaṁ,
sakakammaṁ apassito.
Vinipātaṁ agantvāna,
manussattaṁ gamissati;
Hiraññaṁ tassa nicitaṁ,
koṭisatamanappakaṁ.
Nibbattissati yonimhi,
brāhmaṇe so bhavissati;
Vaṅgantassa suto dhīmā,
sāriyā oraso piyo.
So ca pacchā pabbajitvā,
aṅgīrasassa sāsane;
Cūḷacundoti nāmena,
hessati satthu sāvako.
Sāmaṇerova so santo,
khīṇāsavo bhavissati;
Sabbāsave pariññāya,
nibbāyissatināsavo’.
Upaṭṭhahiṁ mahāvīraṁ,
aññe ca pesale bahū;
Bhātaraṁ me cupaṭṭhāsiṁ,
uttamatthassa pattiyā.
Bhātaraṁ me upaṭṭhitvā,
dhātuṁ pattamhi ohiya;
Sambuddhaṁ upanāmesiṁ,
lokajeṭṭhaṁ narāsabhaṁ.
Ubho hatthehi paggayha,
buddho loke sadevake;
Sandassayanto taṁ dhātuṁ,
kittayi aggasāvakaṁ.
Cittañca suvimuttaṁ me,
saddhā mayhaṁ patiṭṭhitā;
Sabbāsave pariññāya,
viharāmi anāsavo.
Paṭisambhidānuppattā,
Vimokkhāpi ca phassitā;
Chaḷabhiññā sacchikatā,
Kataṁ buddhassa sāsanaṁ”.
Itthaṁ sudaṁ āyasmā cundo thero imā gāthāyo abhāsitthāti.
Cundattherassāpadānaṁ dasamaṁ.
Upālivaggo pañcamo.
Tassuddānaṁ
Upāli soṇo bhaddiyo,
sanniṭṭhāpakahatthiyo;
Chadanaṁ seyyacaṅkamaṁ,
subhaddo cundasavhayo;
Gāthāsataṁ satālīsaṁ,
catasso ca taduttari.