Therāpadāna

Tuvaradāyakavagga

Kuṭidhūpakattheraapadāna

“Siddhatthassa bhagavato,

ahosiṁ kuṭigopako;

Kālena kālaṁ dhūpesiṁ,

pasanno sehi pāṇibhi.

Catunnavutito kappe,

yaṁ kammamakariṁ tadā;

Duggatiṁ nābhijānāmi,

dhūpadānassidaṁ phalaṁ.

Paṭisambhidā catasso,

…pe…

kataṁ buddhassa sāsanaṁ”.

Itthaṁ sudaṁ āyasmā kuṭidhūpako thero imā gāthāyo abhāsitthāti.

Kuṭidhūpakattherassāpadānaṁ pañcamaṁ.