sutta » kn » tha-ap » Therāpadāna

4. Setudāyakattheraapadāna

“Vipassino bhagavato,

caṅkamantassa sammukhā;

Pasannacitto sumano,

setuṁ kārāpayiṁ ahaṁ.

Ekanavutito kappe,

yaṁ setuṁ kārayiṁ ahaṁ;

Duggatiṁ nābhijānāmi,

setudānassidaṁ phalaṁ.

Kilesā jhāpitā mayhaṁ,

…pe…

viharāmi anāsavo.

Svāgataṁ vata me āsi,

…pe…

kataṁ buddhassa sāsanaṁ.

Paṭisambhidā catasso,

…pe…

kataṁ buddhassa sāsanaṁ”.

Itthaṁ sudaṁ āyasmā setudāyako thero imā gāthāyo abhāsitthāti.

Setudāyakattherassāpadānaṁ catutthaṁ.