abhidhamma » ya » ya2 » 2 Khandhayamaka

2.3.4. Paccuppannātītavāra

Yo rūpakkhandhaṁ parijānāti so vedanākkhandhaṁ parijānitthāti? No.

Yo vā pana vedanākkhandhaṁ parijānittha so rūpakkhandhaṁ parijānātīti? No.

Yo rūpakkhandhaṁ na parijānāti so vedanākkhandhaṁ na parijānitthāti?

Arahā rūpakkhandhaṁ na parijānāti, no ca vedanākkhandhaṁ na parijānittha. Aggamaggasamaṅgiñca arahantañca ṭhapetvā avasesā puggalā rūpakkhandhañca na parijānanti vedanākkhandhañca na parijānittha.

Yo vā pana vedanākkhandhaṁ na parijānittha so rūpakkhandhaṁ na parijānātīti?

Aggamaggasamaṅgī vedanākkhandhaṁ na parijānittha, no ca rūpakkhandhaṁ na parijānāti. Aggamaggasamaṅgiñca arahantañca ṭhapetvā avasesā puggalā vedanākkhandhañca na parijānittha rūpakkhandhañca na parijānanti.