Buddhavaṁsa
27. Gotamabuddhavaṁsa
“Ahametarahi sambuddho,
gotamo sakyavaḍḍhano;
Padhānaṁ padahitvāna,
patto sambodhimuttamaṁ.
Brahmunā yācito santo,
dhammacakkaṁ pavattayiṁ;
Aṭṭhārasannaṁ koṭīnaṁ,
paṭhamābhisamayo ahu.
Tato parañca desente,
naradevasamāgame;
Gaṇanāya na vattabbo,
dutiyābhisamayo ahu.
Idhevāhaṁ etarahi,
ovadiṁ mama atrajaṁ;
Gaṇanāya na vattabbo,
tatiyābhisamayo ahu.
Ekosi sannipāto me,
sāvakānaṁ mahesinaṁ;
Aḍḍhateḷasasatānaṁ,
bhikkhūnāsi samāgamo.
Virocamāno vimalo,
bhikkhusaṅghassa majjhago;
Dadāmi patthitaṁ sabbaṁ,
maṇīva sabbakāmado.
Phalamākaṅkhamānānaṁ,
bhavacchandajahesinaṁ;
Catusaccaṁ pakāsemi,
anukampāya pāṇinaṁ.
Dasavīsasahassānaṁ,
dhammābhisamayo ahu;
Ekadvinnaṁ abhisamayo,
gaṇanāto asaṅkhiyo.
Vitthārikaṁ bāhujaññaṁ,
iddhaṁ phītaṁ suphullitaṁ;
Idha mayhaṁ sakyamunino,
sāsanaṁ suvisodhitaṁ.
Anāsavā vītarāgā,
santacittā samāhitā;
Bhikkhūnekasatā sabbe,
parivārenti maṁ sadā.
Idāni ye etarahi,
jahanti mānusaṁ bhavaṁ;
Appattamānasā sekhā,
te bhikkhū viññugarahitā.
Ariyañca santhomayantā,
sadā dhammaratā janā;
Bujjhissanti satimanto,
saṁsārasaritaṁ gatā.
Nagaraṁ kapilavatthu me,
rājā suddhodano pitā;
Mayhaṁ janettikā mātā,
māyādevīti vuccati.
Ekūnatiṁsavassāni,
agāraṁ ajjhahaṁ vasiṁ;
Rammo surammo subhako,
tayo pāsādamuttamā.
Cattārīsasahassāni,
nāriyo samalaṅkatā;
Bhaddakañcanā nāma nārī,
rāhulo nāma atrajo.
Nimitte caturo disvā,
assayānena nikkhamiṁ;
Chabbassaṁ padhānacāraṁ,
acariṁ dukkaraṁ ahaṁ.
Bārāṇasiyaṁ isipatane,
Cakkaṁ pavattitaṁ mayā;
Ahaṁ gotamasambuddho,
Saraṇaṁ sabbapāṇinaṁ.
Kolito upatisso ca,
dve bhikkhū aggasāvakā;
Ānando nāmupaṭṭhāko,
santikāvacaro mama;
Khemā uppalavaṇṇā ca,
bhikkhunī aggasāvikā.
Citto hatthāḷavako ca,
aggupaṭṭhākupāsakā;
Nandamātā ca uttarā,
aggupaṭṭhākupāsikā.
Ahaṁ assatthamūlamhi,
patto sambodhimuttamaṁ;
Byāmappabhā sadā mayhaṁ,
soḷasahatthamuggatā.
Appaṁ vassasataṁ āyu,
idānetarahi vijjati;
Tāvatā tiṭṭhamānohaṁ,
tāremi janataṁ bahuṁ.
Ṭhapayitvāna dhammukkaṁ,
pacchimaṁ janabodhanaṁ;
Ahampi nacirasseva,
saddhiṁ sāvakasaṅghato;
Idheva parinibbissaṁ,
aggīvāhārasaṅkhayā.
Tāni ca atulatejāni,
Imāni ca dasabalāni;
Ayañca guṇadhāraṇo deho,
Dvattiṁsavaralakkhaṇavicitto.
Dasa disā pabhāsetvā,
Sataraṁsīva chappabhā;
Sabbaṁ tamantarahissanti,
Nanu rittā sabbasaṅkhārā”ti.
Gotamassa bhagavato vaṁso pañcavīsatimo.