Jātaka
Catukkanipāta
Pucimandavagga
3. Khantīvādījātaka
“Yo te hatthe ca pāde ca,
kaṇṇanāsañca chedayi;
Tassa kujjha mahāvīra,
mā raṭṭhaṁ vinasā idaṁ”.
“Yo me hatthe ca pāde ca,
kaṇṇanāsañca chedayi;
Ciraṁ jīvatu so rājā,
na hi kujjhanti mādisā”.
Ahū atītamaddhānaṁ,
samaṇo khantidīpano;
Taṁ khantiyāyeva ṭhitaṁ,
kāsirājā achedayi.
Tassa kammapharusassa,
vipāko kaṭuko ahu;
Yaṁ kāsirājā vedesi,
nirayamhi samappitoti.
Khantīvādījātakaṁ tatiyaṁ.