Jātaka
Terasakanipāta
Ambavagga
3. Javanahaṁsajātaka
“Idheva haṁsa nipata,
piyaṁ me tava dassanaṁ;
Issarosi anuppatto,
yamidhatthi pavedaya”.
“Savanena ekassa piyā bhavanti,
Disvā panekassa viyeti chando;
Disvā ca sutvā ca piyā bhavanti,
Kaccinnu me pīyasi dassanena.
Savanena piyo mesi,
bhiyyo cāgamma dassanaṁ;
Evaṁ piyadassano me,
vasa haṁsa mamantike”.
“Vaseyyāma tavāgāre,
niccaṁ sakkatapūjitā;
Matto ca ekadā vajje,
‘haṁsarājaṁ pacantu me’”.
“Dhiratthu taṁ majjapānaṁ,
yaṁ me piyataraṁ tayā;
Na cāpi majjaṁ pissāmi,
yāva me vacchasī ghare”.
“Suvijānaṁ siṅgālānaṁ,
sakuṇānañca vassitaṁ;
Manussavassitaṁ rāja,
dubbijānataraṁ tato.
Api ce maññatī poso,
ñāti mitto sakhāti vā;
Yo pubbe sumano hutvā,
pacchā sampajjate diso.
Yasmiṁ mano nivisati,
avidūre sahāpi so;
Santikepi hi so dūre,
yasmiṁ nāvisate mano.
Antopi so hoti pasannacitto,
Pāraṁ samuddassa pasannacitto;
Antopi so hoti paduṭṭhacitto,
Pāraṁ samuddassa paduṭṭhacitto.
Saṁvasantā vivasanti,
ye disā te rathesabha;
Ārā santo saṁvasanti,
manasā raṭṭhavaḍḍhana.
Aticiraṁ nivāsena,
piyo bhavati appiyo;
Āmanta kho taṁ gacchāma,
purā te homa appiyā”.
“Evañce yācamānānaṁ,
Añjaliṁ nāvabujjhasi;
Paricārakānaṁ sataṁ,
Vacanaṁ na karosi no;
Evaṁ taṁ abhiyācāma,
Puna kayirāsi pariyāyaṁ”.
“Evañce no viharataṁ,
antarāyo na hessati;
Tuyhañcāpi mahārāja,
mayhañca raṭṭhavaḍḍhana;
Appeva nāma passemu,
ahorattānamaccaye”ti.
Javanahaṁsajātakaṁ tatiyaṁ.