Kathāvatthu
Mahāpaṇṇāsaka
Aṭṭhamavagga
Rūpadhātukathā
Rūpino dhammā rūpadhātūti?
Āmantā.
Rūpaṁ bhavo gati sattāvāso saṁsāro yoni viññāṇaṭṭhiti attabhāvapaṭilābhoti?
Na hevaṁ vattabbe …pe…
atthi rūpūpagaṁ kammanti?
Na hevaṁ vattabbe …pe…
atthi rūpūpagā sattāti?
Na hevaṁ vattabbe …pe…
rūpe sattā jāyanti jīyanti mīyanti cavanti upapajjantīti?
Na hevaṁ vattabbe …pe…
rūpe atthi rūpaṁ vedanā saññā saṅkhārā viññāṇanti?
Na hevaṁ vattabbe …pe…
rūpaṁ pañcavokārabhavoti?
Na hevaṁ vattabbe …pe….
Rūpadhātu bhavo gati …pe…
attabhāvapaṭilābhoti?
Āmantā.
Rūpaṁ bhavo gati …pe…
attabhāvapaṭilābhoti?
Na hevaṁ vattabbe …pe…
atthi rūpadhātūpagaṁ kammanti?
Āmantā.
Atthi rūpūpagaṁ kammanti?
Na hevaṁ vattabbe …pe…
atthi rūpadhātūpagā sattāti?
Āmantā.
Atthi rūpūpagā sattāti?
Na hevaṁ vattabbe …pe….
Rūpadhātuyā sattā jāyanti jīyanti mīyanti cavanti upapajjantīti?
Āmantā.
Rūpe sattā jāyanti jīyanti mīyanti cavanti upapajjantīti?
Na hevaṁ vattabbe …pe…
rūpadhātuyā atthi rūpaṁ vedanā saññā saṅkhārā viññāṇanti?
Āmantā.
Rūpe atthi rūpaṁ vedanā saññā saṅkhārā viññāṇanti?
Na hevaṁ vattabbe …pe…
rūpadhātu pañcavokārabhavoti?
Āmantā.
Rūpaṁ pañcavokārabhavoti?
Na hevaṁ vattabbe …pe….
Rūpino dhammā rūpadhātu, kāmadhātuyā atthi rūpanti?
Āmantā.
Sāva kāmadhātu, sā rūpadhātūti?
Na hevaṁ vattabbe …pe…
sāva kāmadhātu, sā rūpadhātūti?
Āmantā.
Kāmabhavena samannāgato puggalo dvīhi bhavehi samannāgato hoti—
kāmabhavena ca rūpabhavena cāti?
Na hevaṁ vattabbe.
Rūpadhātukathā niṭṭhitā.