Kathāvatthu

Mahāpaṇṇāsaka

Sattarasamavagga

Navattabbaṁsaṅghobhuñjatītikathā

Na vattabbaṁ—

“saṅgho bhuñjati pivati khādati sāyatī”ti?

Āmantā.

Nanu atthi keci saṅghabhattāni karonti, uddesabhattāni karonti, yāgupānāni karontīti?

Āmantā.

Hañci atthi keci saṅghabhattāni karonti, uddesabhattāni karonti, yāgupānāni karonti, tena vata re vattabbe—

“saṅgho bhuñjati pivati khādati sāyatī”ti.

Na vattabbaṁ—

“saṅgho bhuñjati pivati khādati sāyatī”ti?

Āmantā.

Nanu vuttaṁ bhagavatā—

“gaṇabhojanaṁ paramparabhojanaṁ atirittabhojanaṁ anatirittabhojanan”ti?

Āmantā.

Hañci vuttaṁ bhagavatā—

“gaṇabhojanaṁ paramparabhojanaṁ atirittabhojanaṁ anatirittabhojanaṁ”, tena vata re vattabbe—

“saṅgho bhuñjati pivati khādati sāyatī”ti.

Na vattabbaṁ—

“saṅgho bhuñjati pivati khādati sāyatī”ti?

Āmantā.

Nanu aṭṭha pānāni vuttāni bhagavatā—

ambapānaṁ, jambupānaṁ, cocapānaṁ, mocapānaṁ, madhukapānaṁ, muddikapānaṁ, sālukapānaṁ, phārusakapānanti?

Āmantā.

Hañci aṭṭha pānāni vuttāni bhagavatā—

ambapānaṁ, jambupānaṁ, cocapānaṁ, mocapānaṁ, madhukapānaṁ, muddikapānaṁ, sālukapānaṁ, phārusakapānaṁ, tena vata re vattabbe—

“saṅgho bhuñjati pivati khādati sāyatī”ti.

Saṅgho bhuñjati pivati khādati sāyatīti?

Āmantā.

Maggo bhuñjati pivati khādati sāyati, phalaṁ bhuñjati pivati khādati sāyatīti?

Na hevaṁ vattabbe …pe….

Na vattabbaṁ saṅgho bhuñjatītikathā niṭṭhitā.