Kathāvatthu
Mahāpaṇṇāsaka
Vīsatimavagga
Tiracchānakathā
Atthi devesu tiracchānagatāti?
Āmantā.
Atthi tiracchānagatesu devāti?
Na hevaṁ vattabbe …pe…
atthi devesu tiracchānagatāti?
Āmantā.
Devaloko tiracchānayonīti?
Na hevaṁ vattabbe …pe…
atthi devesu tiracchānagatāti?
Āmantā.
Atthi tattha kīṭā paṭaṅgā makasā makkhikā ahī vicchikā satapadī gaṇḍuppādāti?
Na hevaṁ vattabbe …pe….
Natthi devesu tiracchānagatāti?
Āmantā.
Nanu atthi tattha erāvaṇo nāma hatthināgo sahassayuttaṁ dibbaṁ yānanti?
Āmantā.
Hañci atthi tattha erāvaṇo nāma hatthināgo sahassayuttaṁ dibbaṁ yānaṁ, tena vata re vattabbe—
“atthi devesu tiracchānagatā”ti.
Atthi devesu tiracchānagatāti?
Āmantā.
Atthi tattha hatthibandhā assabandhā yāvasikā kāraṇikā bhattakārakāti?
Na hevaṁ vattabbe.
Tena hi natthi devesu tiracchānagatāti.
Tiracchānakathā niṭṭhitā.