Therāpadāna
Kuṇḍadhānavagga
Kāḷudāyittheraapadāna
“Padumuttarabuddhassa,
lokajeṭṭhassa tādino;
Addhānaṁ paṭipannassa,
carato cārikaṁ tadā.
Suphullaṁ padumaṁ gayha,
uppalaṁ mallikañcahaṁ;
Paramannaṁ gahetvāna,
adāsiṁ satthuno ahaṁ.
Paribhuñji mahāvīro,
paramannaṁ subhojanaṁ;
Tañca pupphaṁ gahetvāna,
janassa sampadassayi.
Iṭṭhaṁ kantaṁ piyaṁ loke,
jalajaṁ pupphamuttamaṁ;
Sudukkaraṁ kataṁ tena,
yo me pupphaṁ adāsidaṁ.
Yo pupphamabhiropesi,
paramannañcadāsi me;
Tamahaṁ kittayissāmi,
suṇātha mama bhāsato.
‘Dasa aṭṭha cakkhattuṁ so,
devarajjaṁ karissati;
Uppalaṁ padumañcāpi,
mallikañca taduttari.
Assa puññavipākena,
dibbagandhasamāyutaṁ;
Ākāse chadanaṁ katvā,
dhārayissati tāvade.
Pañcavīsatikkhattuñca,
cakkavattī bhavissati;
Pathabyā rajjaṁ pañcasataṁ,
vasudhaṁ āvasissati.
Kappasatasahassamhi,
okkākakulasambhavo;
Gotamo nāma gottena,
satthā loke bhavissati.
Sakakammābhiraddho so,
sukkamūlena codito;
Sakyānaṁ nandijanano,
ñātibandhu bhavissati.
So pacchā pabbajitvāna,
sukkamūlena codito;
Sabbāsave pariññāya,
nibbāyissatināsavo.
Paṭisambhidamanuppattaṁ,
katakiccamanāsavaṁ;
Gotamo lokabandhu taṁ,
etadagge ṭhapessati.
Padhānapahitatto so,
upasanto nirūpadhi;
Udāyī nāma nāmena,
hessati satthu sāvako’.
Rāgo doso ca moho ca,
māno makkho ca dhaṁsito;
Sabbāsave pariññāya,
viharāmi anāsavo.
Tosayiñcāpi sambuddhaṁ,
ātāpī nipako ahaṁ;
Pasādito ca sambuddho,
etadagge ṭhapesi maṁ.
Paṭisambhidā catasso,
…pe…
kataṁ buddhassa sāsanaṁ”.
Itthaṁ sudaṁ āyasmā kāḷudāyī thero imā gāthāyo abhāsitthāti.
Kāḷudāyittherassāpadānaṁ catutthaṁ.