Therāpadāna
Mahāparivāravagga
6. Citakapūjakattheraapadāna
“Vasāmi rājāyatane,
sāmacco saparijjano;
Parinibbute bhagavati,
sikhino lokabandhuno.
Pasannacitto sumano,
citakaṁ agamāsahaṁ;
Tūriyaṁ tattha vādetvā,
gandhamālaṁ samokiriṁ.
Citamhi pūjaṁ katvāna,
vanditvā citakaṁ ahaṁ;
Pasannacitto sumano,
sakaṁ bhavanupāgamiṁ.
Bhavane upaviṭṭhohaṁ,
citapūjaṁ anussariṁ;
Tena kammena dvipadinda,
lokajeṭṭha narāsabha.
Anubhotvāna sampattiṁ,
devesu mānusesu ca;
Pattomhi acalaṁ ṭhānaṁ,
hitvā jayaparājayaṁ.
Ekattiṁse ito kappe,
yaṁ pupphamabhiropayiṁ;
Duggatiṁ nābhijānāmi,
citapūjāyidaṁ phalaṁ.
Ekūnatiṁsakappamhi,
ito soḷasa rājāno;
Uggatā nāma nāmena,
cakkavattī mahabbalā.
Paṭisambhidā catasso,
…pe…
kataṁ buddhassa sāsanaṁ”.
Itthaṁ sudaṁ āyasmā citakapūjako thero imā gāthāyo abhāsitthāti.
Citakapūjakattherassāpadānaṁ chaṭṭhaṁ.