Therāpadāna
Sobhitavagga
7. Atthasandassakattheraapadāna
“Visālamāḷe āsīno,
addasaṁ lokanāyakaṁ;
Khīṇāsavaṁ balappattaṁ,
bhikkhusaṅghapurakkhataṁ.
Satasahassā tevijjā,
chaḷabhiññā mahiddhikā;
Parivārenti sambuddhaṁ,
ko disvā nappasīdati.
Ñāṇe upanidhā yassa,
na vijjati sadevake;
Anantañāṇaṁ sambuddhaṁ,
ko disvā nappasīdati.
Dhammakāyañca dīpentaṁ,
kevalaṁ ratanākaraṁ;
Vikappetuṁ na sakkonti,
ko disvā nappasīdati.
Imāhi tīhi gāthāhi,
nāradovhayavacchalo;
Padumuttaraṁ thavitvāna,
sambuddhaṁ aparājitaṁ.
Tena cittappasādena,
buddhasanthavanena ca;
Kappānaṁ satasahassaṁ,
duggatiṁ nupapajjahaṁ.
Ito tiṁsakappasate,
sumitto nāma khattiyo;
Sattaratanasampanno,
cakkavattī mahabbalo.
Paṭisambhidā catasso,
…pe…
kataṁ buddhassa sāsanaṁ”.
Itthaṁ sudaṁ āyasmā atthasandassako thero imā gāthāyo abhāsitthāti.
Atthasandassakattherassāpadānaṁ sattamaṁ.