Therāpadāna

Padumakesaravagga

Paramannadāyakattheraapadāna

“Kaṇikāraṁva jotantaṁ,

udayantaṁva bhāṇumaṁ;

Vipassiṁ addasaṁ buddhaṁ,

lokajeṭṭhaṁ narāsabhaṁ.

Añjaliṁ paggahetvāna,

abhinesiṁ sakaṁ gharaṁ;

Abhinetvāna sambuddhaṁ,

paramannamadāsahaṁ.

Ekanavutito kappe,

paramannamadiṁ tadā;

Duggatiṁ nābhijānāmi,

paramannassidaṁ phalaṁ.

Paṭisambhidā catasso,

…pe…

kataṁ buddhassa sāsanaṁ”.

Itthaṁ sudaṁ āyasmā paramannadāyako thero imā gāthāyo abhāsitthāti.

Paramannadāyakattherassāpadānaṁ tatiyaṁ.