abhidhamma » ya » ya5 » 5 Saccayamaka

5.3.6. Atītānāgatavāra

Yo dukkhasaccaṁ parijānittha so samudayasaccaṁ pajahissatīti? No.

Yo vā pana samudayasaccaṁ pajahissati so dukkhasaccaṁ parijānitthāti? No.

Yo dukkhasaccaṁ na parijānittha so samudayasaccaṁ nappajahissatīti?

Ye maggaṁ paṭilabhissanti te dukkhasaccaṁ na parijānittha, no ca te samudayasaccaṁ nappajahissanti. Aggamaggasamaṅgī ye ca puthujjanā maggaṁ na paṭilabhissanti te dukkhasaccañca na parijānittha samudayasaccañca nappajahissanti.

Yo vā pana samudayasaccaṁ nappajahissati so dukkhasaccaṁ na parijānitthāti?

Arahā samudayasaccaṁ nappajahissati, no ca dukkhasaccaṁ na parijānittha. Aggamaggasamaṅgī ye ca puthujjanā maggaṁ na paṭilabhissanti te samudayasaccañca nappajahissanti dukkhasaccañca na parijānittha.

Pariññāvāro.

Saccayamakapāḷi niṭṭhitā.