Jātaka
Catukkanipāta
Cūḷakuṇālavagga
1. Kaṇḍarījātaka
Narānamārāmakarāsu nārisu,
Anekacittāsu aniggahāsu ca;
Sabbattha nāpītikarāpi ce siyā,
Na vissase titthasamā hi nāriyo.
“Yaṁ ve disvā kaṇḍarīkinnarānaṁ,
Sabbitthiyo na ramanti agāre;
Taṁ tādisaṁ maccaṁ cajitvā bhariyā,
Aññaṁ disvā purisaṁ pīṭhasappiṁ”.
“Bakassa ca bāvarikassa rañño,
Accantakāmānugatassa bhariyā;
Avācarī paṭṭhavasānugassa,
Kaṁ vāpi itthī nāticare tadaññaṁ”.
“Piṅgiyānī sabbalokissarassa,
Rañño piyā brahmadattassa bhariyā;
Avācarī paṭṭhavasānugassa,
Taṁ vāpi sā nājjhagā kāmakāminī”ti.
Kaṇḍarījātakaṁ paṭhamaṁ.