abhidhamma » kv » kv4 » Kathāvatthu

Aparāpisamannāgatakathā

Arahattasacchikiriyāya paṭipanno puggalo tīhi phalehi samannāgatoti?

Āmantā.

Arahattasacchikiriyāya paṭipanno puggalo catūhi phassehi catūhi vedanāhi catūhi saññāhi catūhi cetanāhi catūhi cittehi catūhi saddhāhi catūhi vīriyehi catūhi satīhi catūhi samādhīhi catūhi paññāhi samannāgatoti?

Na hevaṁ vattabbe …pe….

Anāgāmiphalasacchikiriyāya paṭipanno puggalo dvīhi phalehi samannāgatoti?

Āmantā.

Anāgāmiphalasacchikiriyāya paṭipanno puggalo tīhi phassehi tīhi vedanāhi …pe…

tīhi paññāhi samannāgatoti?

Na hevaṁ vattabbe …pe….

Sakadāgāmiphalasacchikiriyāya paṭipanno puggalo sotāpattiphalena samannāgatoti?

Āmantā.

Sakadāgāmiphalasacchikiriyāya paṭipanno puggalo dvīhi phassehi dvīhi vedanāhi …pe…

dvīhi paññāhi samannāgatoti?

Na hevaṁ vattabbe …pe….

Arahattasacchikiriyāya paṭipanno puggalo sotāpattiphalena samannāgatoti?

Āmantā.

Arahattasacchikiriyāya paṭipanno puggalo sotāpanno sattakkhattuparamo, kolaṅkolo, ekabījīti?

Na hevaṁ vattabbe …pe….

Arahattasacchikiriyāya paṭipanno puggalo sakadāgāmiphalena samannāgatoti?

Āmantā.

Arahattasacchikiriyāya paṭipanno puggalo sakadāgāmīti?

Na hevaṁ vattabbe …pe….

Arahattasacchikiriyāya paṭipanno puggalo anāgāmiphalena samannāgatoti?

Āmantā.

Arahattasacchikiriyāya paṭipanno puggalo anāgāmī antarāparinibbāyī, upahaccaparinibbāyī, asaṅkhāraparinibbāyī, sasaṅkhāraparinibbāyī, uddhaṁsoto akaniṭṭhagāmīti?

Na hevaṁ vattabbe …pe….

Anāgāmiphalasacchikiriyāya paṭipanno puggalo sotāpattiphalena samannāgatoti?

Āmantā.

Anāgāmiphalasacchikiriyāya paṭipanno puggalo sotāpanno sattakkhattuparamo, kolaṅkolo, ekabījīti?

Na hevaṁ vattabbe …pe….

Anāgāmiphalasacchikiriyāya paṭipanno puggalo sakadāgāmiphalena samannāgatoti?

Āmantā.

Anāgāmiphalasacchikiriyāya paṭipanno puggalo sakadāgāmīti?

Na hevaṁ vattabbe …pe….

Sakadāgāmiphalasacchikiriyāya paṭipanno puggalo sotāpattiphalena samannāgatoti?

Āmantā.

Sakadāgāmiphalasacchikiriyāya paṭipanno puggalo sotāpanno sattakkhattuparamo, kolaṅkolo, ekabījīti?

Na hevaṁ vattabbe …pe….

Sotāpattiphalena samannāgato “sotāpanno”ti vattabboti?

Āmantā.

Arahattasacchikiriyāya paṭipanno puggalo sotāpattiphalena samannāgatoti?

Āmantā.

Sveva arahattasacchikiriyāya paṭipanno puggalo, so sotāpannoti?

Na hevaṁ vattabbe …pe….

Sakadāgāmiphalena samannāgato “sakadāgāmī”ti vattabboti?

Āmantā.

Arahattasacchikiriyāya paṭipanno puggalo sakadāgāmiphalena samannāgatoti?

Āmantā.

Sveva arahattasacchikiriyāya paṭipanno puggalo, so sakadāgāmīti?

Na hevaṁ vattabbe …pe….

Anāgāmiphalena samannāgato “anāgāmī”ti vattabboti?

Āmantā.

Arahattasacchikiriyāya paṭipanno puggalo anāgāmiphalena samannāgatoti?

Āmantā.

Sveva arahattasacchikiriyāya paṭipanno puggalo, so anāgāmīti?

Na hevaṁ vattabbe …pe….

Sotāpattiphalena samannāgato “sotāpanno”ti vattabboti?

Āmantā.

Anāgāmiphalasacchikiriyāya paṭipanno puggalo sotāpattiphalena samannāgatoti?

Āmantā.

Sveva anāgāmiphalasacchikiriyāya paṭipanno puggalo, so sotāpannoti?

Na hevaṁ vattabbe …pe….

Sakadāgāmiphalena samannāgato “sakadāgāmī”ti vattabboti?

Āmantā.

Anāgāmiphalasacchikiriyāya paṭipanno puggalo sakadāgāmiphalena samannāgatoti?

Āmantā.

Sveva anāgāmiphalasacchikiriyāya paṭipanno puggalo, so sakadāgāmīti?

Na hevaṁ vattabbe …pe….

Sotāpattiphalena samannāgato “sotāpannoti” vattabboti?

Āmantā.

Sakadāgāmiphalasacchikiriyāya paṭipanno puggalo sotāpattiphalena samannāgatoti?

Āmantā.

Sveva sakadāgāmiphalasacchikiriyāya paṭipanno puggalo, so sotāpannoti?

Na hevaṁ vattabbe …pe….

Arahattasacchikiriyāya paṭipanno puggalo sotāpattiphalena samannāgatoti?

Āmantā.

Nanu arahattasacchikiriyāya paṭipanno puggalo sotāpattiphalaṁ vītivattoti?

Āmantā.

Hañci arahattasacchikiriyāya paṭipanno puggalo sotāpattiphalaṁ vītivatto, no ca vata re vattabbe—

“arahattasacchikiriyāya paṭipanno puggalo sotāpattiphalena samannāgato”ti.

Arahattasacchikiriyāya paṭipanno puggalo sotāpattiphalaṁ vītivatto, tena samannāgatoti?

Āmantā.

Arahattasacchikiriyāya paṭipanno puggalo sotāpattimaggaṁ vītivatto, sakkāyadiṭṭhiṁ vicikicchaṁ sīlabbataparāmāsaṁ apāyagamanīyaṁ rāgaṁ apāyagamanīyaṁ dosaṁ apāyagamanīyaṁ mohaṁ vītivatto, tena samannāgatoti?

Na hevaṁ vattabbe …pe….

Arahattasacchikiriyāya paṭipanno puggalo sakadāgāmiphalena samannāgatoti?

Āmantā.

Nanu arahattasacchikiriyāya paṭipanno puggalo sakadāgāmiphalaṁ vītivattoti?

Āmantā.

Hañci arahattasacchikiriyāya paṭipanno puggalo sakadāgāmiphalaṁ vītivatto, no ca vata re vattabbe—

“arahattasacchikiriyāya paṭipanno puggalo sakadāgāmiphalena samannāgato”ti.

Arahattasacchikiriyāya paṭipanno puggalo sakadāgāmiphalaṁ vītivatto, tena samannāgatoti?

Āmantā.

Arahattasacchikiriyāya paṭipanno puggalo sakadāgāmimaggaṁ vītivatto, oḷārikaṁ kāmarāgaṁ oḷārikaṁ byāpādaṁ vītivatto, tena samannāgatoti?

Na hevaṁ vattabbe …pe….

Arahattasacchikiriyāya paṭipanno puggalo anāgāmiphalena samannāgatoti?

Āmantā.

Nanu arahattasacchikiriyāya paṭipanno puggalo anāgāmiphalaṁ vītivattoti?

Āmantā.

Hañci arahattasacchikiriyāya paṭipanno puggalo anāgāmiphalaṁ vītivatto, no ca vata re vattabbe—

“arahattasacchikiriyāya paṭipanno puggalo anāgāmiphalena samannāgato”ti.

Arahattasacchikiriyāya paṭipanno puggalo anāgāmiphalaṁ vītivatto, tena samannāgatoti?

Āmantā.

Arahattasacchikiriyāya paṭipanno puggalo anāgāmimaggaṁ vītivatto, aṇusahagataṁ kāmarāgaṁ aṇusahagataṁ byāpādaṁ vītivatto, tena samannāgatoti?

Na hevaṁ vattabbe …pe….

Anāgāmiphalasacchikiriyāya paṭipanno puggalo sotāpattiphalena samannāgatoti?

Āmantā.

Nanu anāgāmiphalasacchikiriyāya paṭipanno puggalo sotāpattiphalaṁ vītivattoti?

Āmantā.

Hañci anāgāmiphalasacchikiriyāya paṭipanno puggalo sotāpattiphalaṁ vītivatto, no ca vata re vattabbe—

“anāgāmiphalasacchikiriyāya paṭipanno puggalo sotāpattiphalena samannāgato”ti.

Anāgāmiphalasacchikiriyāya paṭipanno puggalo sotāpattiphalaṁ vītivatto, tena samannāgatoti?

Āmantā.

Anāgāmiphalasacchikiriyāya paṭipanno puggalo sotāpattimaggaṁ vītivatto, sakkāyadiṭṭhiṁ …pe…

apāyagamanīyaṁ mohaṁ vītivatto, tena samannāgatoti?

Na hevaṁ vattabbe …pe….

Anāgāmiphalasacchikiriyāya paṭipanno puggalo sakadāgāmiphalena samannāgatoti?

Āmantā.

Nanu anāgāmiphalasacchikiriyāya paṭipanno puggalo sakadāgāmiphalaṁ vītivattoti?

Āmantā.

Hañci anāgāmiphalasacchikiriyāya paṭipanno puggalo sakadāgāmiphalaṁ vītivatto, no ca vata re vattabbe—

“anāgāmiphalasacchikiriyāya paṭipanno puggalo sakadāgāmiphalena samannāgato”ti.

Anāgāmiphalasacchikiriyāya paṭipanno puggalo sakadāgāmiphalaṁ vītivatto, tena samannāgatoti?

Āmantā.

Anāgāmiphalasacchikiriyāya paṭipanno puggalo sakadāgāmimaggaṁ vītivatto, oḷārikaṁ kāmarāgaṁ oḷārikaṁ byāpādaṁ vītivatto, tena samannāgatoti?

Na hevaṁ vattabbe …pe….

Sakadāgāmiphalasacchikiriyāya paṭipanno puggalo sotāpattiphalena samannāgatoti?

Āmantā.

Nanu sakadāgāmiphalasacchikiriyāya paṭipanno puggalo sotāpattiphalaṁ vītivattoti?

Āmantā.

Hañci sakadāgāmiphalasacchikiriyāya paṭipanno puggalo sotāpattiphalaṁ vītivatto, no ca vata re vattabbe—

“sakadāgāmiphalasacchikiriyāya paṭipanno puggalo sotāpattiphalena samannāgato”ti.

Sakadāgāmiphalasacchikiriyāya paṭipanno puggalo sotāpattiphalaṁ vītivatto, tena samannāgatoti?

Āmantā.

Sakadāgāmiphalasacchikiriyāya paṭipanno puggalo sotāpattimaggaṁ vītivatto, sakkāyadiṭṭhiṁ …pe…

apāyagamanīyaṁ mohaṁ vītivatto, tena samannāgatoti?

Na hevaṁ vattabbe …pe….

Na vattabbaṁ—

“arahattasacchikiriyāya paṭipanno puggalo tīhi phalehi samannāgato”ti?

Āmantā.

Nanu arahattasacchikiriyāya paṭipannena puggalena tīṇi phalāni paṭiladdhāni, tehi ca aparihīnoti?

Āmantā.

Hañci arahattasacchikiriyāya paṭipannena puggalena tīṇi phalāni paṭiladdhāni tehi ca aparihīno, tena vata re vattabbe—

“arahattasacchikiriyāya paṭipanno puggalo tīhi phalehi samannāgato”ti.

Na vattabbaṁ—

“anāgāmiphalasacchikiriyāya paṭipanno puggalo dvīhi phalehi samannāgato”ti?

Āmantā.

Nanu anāgāmiphalasacchikiriyāya paṭipannena puggalena dve phalāni paṭiladdhāni, tehi ca aparihīnoti?

Āmantā.

Hañci anāgāmiphalasacchikiriyāya paṭipannena puggalena dve phalāni paṭiladdhāni tehi ca aparihīno, tena vata re vattabbe—

“anāgāmiphalasacchikiriyāya paṭipanno puggalo dvīhi phalehi samannāgato”ti.

Na vattabbaṁ—

“sakadāgāmiphalasacchikiriyāya paṭipanno puggalo sotāpattiphalena samannāgato”ti?

Āmantā.

Nanu sakadāgāmiphalasacchikiriyāya paṭipannena puggalena sotāpattiphalaṁ paṭiladdhaṁ, tena ca aparihīnoti?

Āmantā.

Hañci sakadāgāmiphalasacchikiriyāya paṭipannena puggalena sotāpattiphalaṁ paṭiladdhaṁ tena ca aparihīno, tena vata re vattabbe—

“sakadāgāmiphalasacchikiriyāya paṭipanno puggalo sotāpattiphalena samannāgato”ti.

Arahattasacchikiriyāya paṭipannena puggalena tīṇi phalāni paṭiladdhāni tehi ca aparihīnoti, arahattasacchikiriyāya paṭipanno puggalo tīhi phalehi samannāgatoti?

Āmantā.

Arahattasacchikiriyāya paṭipannena puggalena cattāro maggā paṭiladdhā tehi ca aparihīnoti, arahattasacchikiriyāya paṭipanno puggalo catūhi maggehi samannāgatoti?

Na hevaṁ vattabbe …pe….

Anāgāmiphalasacchikiriyāya paṭipannena puggalena dve phalāni paṭiladdhāni tehi ca aparihīnoti, anāgāmiphalasacchikiriyāya paṭipanno puggalo dvīhi phalehi samannāgatoti?

Āmantā.

Anāgāmiphalasacchikiriyāya paṭipannena puggalena tayo maggā paṭiladdhā tehi ca aparihīnoti, anāgāmiphalasacchikiriyāya paṭipanno puggalo tīhi maggehi samannāgatoti?

Na hevaṁ vattabbe …pe….

Sakadāgāmiphalasacchikiriyāya paṭipannena puggalena sotāpattiphalaṁ paṭiladdhaṁ tena ca aparihīnoti, sakadāgāmiphalasacchikiriyāya paṭipanno puggalo sotāpattiphalena samannāgatoti?

Āmantā.

Sakadāgāmiphalasacchikiriyāya paṭipannena puggalena dve maggā paṭiladdhā tehi ca aparihīnoti, sakadāgāmiphalasacchikiriyāya paṭipanno puggalo dvīhi maggehi samannāgatoti?

Na hevaṁ vattabbe …pe….

Aparāpi samannāgatakathā niṭṭhitā.