Kathāvatthu
Khuddakaaḍḍhapaṇṇāsaka
Ekavīsatimavagga
Sāsanakathā
Sāsanaṁ navaṁ katanti?
Āmantā.
Satipaṭṭhānā navaṁ katāti?
Na hevaṁ vattabbe …pe…
sāsanaṁ navaṁ katanti?
Āmantā.
Sammappadhānā …pe…
iddhipādā …pe…
indriyā …pe…
balā …pe…
bojjhaṅgā navaṁ katāti?
Na hevaṁ vattabbe …pe…
pubbe akusalaṁ pacchā kusalaṁ katanti?
Na hevaṁ vattabbe …pe…
pubbe sāsavaṁ …pe… saṁyojaniyaṁ ganthaniyaṁ oghaniyaṁ yoganiyaṁ nīvaraṇiyaṁ parāmaṭṭhaṁ upādāniyaṁ …pe… saṅkilesiyaṁ pacchā asaṅkilesiyaṁ katanti?
Na hevaṁ vattabbe …pe….
Atthi koci tathāgatassa sāsanaṁ navaṁ karotīti?
Āmantā.
Atthi koci satipaṭṭhāne navaṁ karotīti?
Na hevaṁ vattabbe …pe…
atthi koci sammappadhāne …pe…
iddhipāde …pe…
indriye …pe…
bale …pe…
bojjhaṅge navaṁ karotīti?
Na hevaṁ vattabbe …pe…
atthi koci pubbe akusalaṁ pacchā kusalaṁ karotīti?
Na hevaṁ vattabbe …pe…
atthi koci pubbe sāsavaṁ …pe… saṅkilesiyaṁ pacchā asaṅkilesiyaṁ karotīti?
Na hevaṁ vattabbe …pe….
Labbhā tathāgatassa sāsanaṁ puna navaṁ kātunti?
Āmantā.
Labbhā satipaṭṭhānā puna navaṁ kātunti?
Na hevaṁ vattabbe …pe…
labbhā sammappadhānā …pe…
iddhipādā …pe…
indriyā …pe…
balā …pe…
bojjhaṅgā puna navaṁ kātunti?
Na hevaṁ vattabbe …pe…
labbhā pubbe akusalaṁ pacchā kusalaṁ kātunti?
Na hevaṁ vattabbe …pe…
labbhā pubbe sāsavaṁ …pe… saṅkilesiyaṁ pacchā asaṅkilesiyaṁ kātunti?
Na hevaṁ vattabbe …pe….
Sāsanakathā niṭṭhitā.