sutta » kn » ps » Paṭisambhidāmagga

1.7. Kammakathā

Ahosi kammaṁ, ahosi kammavipāko.

Ahosi kammaṁ, nāhosi kammavipāko.

Ahosi kammaṁ, atthi kammavipāko.

Ahosi kammaṁ, natthi kammavipāko.

Ahosi kammaṁ, bhavissati kammavipāko.

Ahosi kammaṁ, na bhavissati kammavipāko.

(Atītakammaṁ)

Atthi kammaṁ, atthi kammavipāko.

Atthi kammaṁ, natthi kammavipāko.

Atthi kammaṁ, bhavissati kammavipāko.

Atthi kammaṁ, na bhavissati kammavipāko.

(Paccuppannakammaṁ)

Bhavissati kammaṁ, bhavissati kammavipāko.

Bhavissati kammaṁ, na bhavissati kammavipāko.

(Anāgatakammaṁ)

Ahosi kusalaṁ kammaṁ, ahosi kusalassa kammassa vipāko.

Ahosi kusalaṁ kammaṁ, nāhosi kusalassa kammassa vipāko.

Ahosi kusalaṁ kammaṁ, atthi kusalassa kammassa vipāko.

Ahosi kusalaṁ kammaṁ, natthi kusalassa kammassa vipāko.

Ahosi kusalaṁ kammaṁ, bhavissati kusalassa kammassa vipāko.

Ahosi kusalaṁ kammaṁ, na bhavissati kusalassa kammassa vipāko.

Atthi kusalaṁ kammaṁ, atthi kusalassa kammassa vipāko.

Atthi kusalaṁ kammaṁ, natthi kusalassa kammassa vipāko.

Atthi kusalaṁ kammaṁ, bhavissati kusalassa kammassa vipāko.

Atthi kusalaṁ kammaṁ, na bhavissati kusalassa kammassa vipāko.

Bhavissati kusalaṁ kammaṁ, bhavissati kusalassa kammassa vipāko.

Bhavissati kusalaṁ kammaṁ, na bhavissati kusalassa kammassa vipāko.

Ahosi akusalaṁ kammaṁ, ahosi akusalassa kammassa vipāko.

Ahosi akusalaṁ kammaṁ, nāhosi akusalassa kammassa vipāko.

Ahosi akusalaṁ kammaṁ, atthi akusalassa kammassa vipāko.

Ahosi akusalaṁ kammaṁ, natthi akusalassa kammassa vipāko.

Ahosi akusalaṁ kammaṁ, bhavissati akusalassa kammassa vipāko.

Ahosi akusalaṁ kammaṁ, na bhavissati akusalassa kammassa vipāko.

Atthi akusalaṁ kammaṁ, atthi akusalassa kammassa vipāko.

Atthi akusalaṁ kammaṁ, natthi akusalassa kammassa vipāko.

Atthi akusalaṁ kammaṁ, bhavissati akusalassa kammassa vipāko.

Atthi akusalaṁ kammaṁ, na bhavissati akusalassa kammassa vipāko.

Bhavissati akusalaṁ kammaṁ, bhavissati akusalassa kammassa vipāko.

Bhavissati akusalaṁ kammaṁ, na bhavissati akusalassa kammassa vipāko.

Ahosi sāvajjaṁ kammaṁ …pe…

ahosi anavajjaṁ kammaṁ …pe…

ahosi kaṇhaṁ kammaṁ …pe…

ahosi sukkaṁ kammaṁ …pe…

ahosi sukhudrayaṁ kammaṁ …pe…

ahosi dukkhudrayaṁ kammaṁ …pe…

ahosi sukhavipākaṁ kammaṁ …pe…

ahosi dukkhavipākaṁ kammaṁ, ahosi dukkhavipākassa kammassa vipāko.

Ahosi dukkhavipākaṁ kammaṁ, nāhosi dukkhavipākassa kammassa vipāko.

Ahosi dukkhavipākaṁ kammaṁ, atthi dukkhavipākassa kammassa vipāko.

Ahosi dukkhavipākaṁ kammaṁ, natthi dukkhavipākassa kammassa vipāko.

Ahosi dukkhavipākaṁ kammaṁ, bhavissati dukkhavipākassa kammassa vipāko.

Ahosi dukkhavipākaṁ kammaṁ, na bhavissati dukkhavipākassa kammassa vipāko.

Atthi dukkhavipākaṁ kammaṁ, atthi dukkhavipākassa kammassa vipāko.

Atthi dukkhavipākaṁ kammaṁ, natthi dukkhavipākassa kammassa vipāko.

Atthi dukkhavipākaṁ kammaṁ, bhavissati dukkhavipākassa kammassa vipāko.

Atthi dukkhavipākaṁ kammaṁ, na bhavissati dukkhavipākassa kammassa vipāko.

Bhavissati dukkhavipākaṁ kammaṁ, bhavissati dukkhavipākassa kammassa vipāko.

Bhavissati dukkhavipākaṁ kammaṁ, na bhavissati dukkhavipākassa kammassa vipākoti.

Kammakathā niṭṭhitā.