Therāpadāna

Supāricariyavagga

7 Yūthikapupphiyattheraapadāna

“Candabhāgānadītīre,

anusotaṁ vajāmahaṁ;

Sayambhuṁ addasaṁ tattha,

sālarājaṁva phullitaṁ.

Pupphaṁ yūthikamādāya,

upagacchiṁ mahāmuniṁ;

Pasannacitto sumano,

buddhassa abhiropayiṁ.

Catunnavutito kappe,

yaṁ pupphamabhiropayiṁ;

Duggatiṁ nābhijānāmi,

buddhapūjāyidaṁ phalaṁ.

Sattasaṭṭhimhito kappe,

eko sāmuddharo ahuṁ;

Sattaratanasampanno,

cakkavattī mahabbalo.

Paṭisambhidā catasso,

…pe…

kataṁ buddhassa sāsanaṁ”.

Itthaṁ sudaṁ āyasmā yūthikapupphiyo thero imā gāthāyo abhāsitthāti.

Yūthikapupphiyattherassāpadānaṁ sattamaṁ.